Մեր կազմակերպությունը իր առաքելությունն իրականացնում է ՁԵՐ ֆինանսական աջակցությանն շնորհիվ: ԵՂԵ՛Ք ՄԵՐ ԿՈՂՔԻՆ

Երբ 2020 թվականի սեպտեմբերյան չարաբաստիկ առավոտը բոթեց պատերազմի մասին, կյանքը կանգ առավ հայոց երկրում, աշխարհասփյուռ հայերի օջախներում: Առաջին միտքը, որ ունեցան աշխարհի բոլոր հայերը, այդ թվում կազմակերպության տնօրեն Անահիտ Մնացականյանը՝ ինչ – որ կերպ օգնել կորուստներ ունեցած մարդկանց, որոնց թիվը օրեցօր ավելանում էր: Օգնել հատկապես երեխաներին, որոնց մանկությունը ինչ-որ հատվածում, իրենց համար անհասկանալի իրավիճակում խաթարվել էր: Սթափվելու համար շատ երկար ժամանակ էր պետք, սակայն անկարելի էր տանջվել՝ ձեռք մեկնելու փոխարեն: Եվ ահա, 2021 թվականի ապրիլի 15-ին ստեղծվեց  «ՀԱՅՔ» կրթական և սոցիալ-հոգեբանական աջակցության կենտրոն ՀԿ-ն՝ համախմբելու այն լույս էակներին, որոնց աչքերի կրակը շլացուցիչ լույսով ուղղորդում է դեպի ավետյաց երկրի լուսապսակ ապագան: Այդ կրակը պետք էր միշտ վառ պահել՝ կրթելով, հմտություններ և կարողություններ զարգացնելով, առողջ միտք սերմանելով և առողջ հոգի կերտելով:

Փնտրտուքներն ու բոլոր ճանապարհները կանաչ լույսով տանում էին դեպի բարի մարդիկ, ովքեր  առանց երկմտելու կանգնեցին կազմակերպության կողքին՝ իրականացնելու համար նվիրական նպատակները՝ ոմանք կամավոր աշխատանքով, ոմանք՝ խորհուրդներով և աջակցությամբ, ոմանք՝ քաջալերելով և, որ ամենակարևորներից է՝ ֆինանսական աջակցությամբ:

Կազմակերպության համար նախատեսված տարածքի վերանորոգումը սկսվեց մայիս ամսից: Նպատակը, հուլիսին  ծրագրի մեկնարկն ազդարարելն էր: ՀԿ-ի գործունեությանը շատ արագ կամավորագրվեցին 6 ուսանողուհիներ, ովքեր սկսեցին իրականացնել սոցիալական հարցումներ՝ շահառու երեխաների և նրանց ընտանիքների կարիքի գնահատում իրականացնելով: Ու շատ շուտով կենտրոնն ունեցավ նախնական տեղեկատվական բազա, որը թույլ էր տալիս կազմակերպել աշխատանքները:  Այս ամենին զուգահեռ ՀԿ-ն սկսեց իրականացնել «Ծնունդդ Շնորհավոր»  ծրագիրը, որի շրջանակներում կազմակերպվում էին անակնկալներ արցախյան երկրորդ պատերազմում ընկած մեր հերոսների երեխաների ծննդյան տարեդարձերին:

 Եվ հուլիսին արդեն «ՀԱՅՔ» ուսումնական և զարգացման կենտրոնը ազդարարեց իր բացումը: Կենտրոնի շահառուները կյանքի դժվարին իրավիճակներում հայտնված երեխաներն ու երիտասարդներն են, և մասնավորապես մեր անմահ հերոսների երեխաներն ու հայրենի տունը կորցրած և Հայաստանի տարբեր բնակավայրերում ապաստանած արցախցի երեխաները: Կենտրոնում երեխաները սովորում են ձեռագործություն ՝ գոբելեն, մաքրամե, հուլունքագործություն, տիկնիկագործություն, նկարչություն, համակարգչային հմտություններ, անցկացվում  են անգլերենի և էկոլոգիայի դասընթացներ: Կազմակերպվում են ուսուցողական էքսկուրսիաներ, արշավներ, ցուցահանդեսներ:

Այսօր երեխաների թիվն ավելացել է 2023թ. դեպքերից հետո, որոնց համար կազմակերպությունն աշխատում է նույն ջանասիրությամբ:

Շահառուների թիվը կազմում է մոտ 70 երեխա: